|
Fredag 29/6 og laurdag
30/6 er det
sommarkonsertar i Jelsa Kyrkje og på Kulturhuset i Suldal. Det store
trekkplastret er Sigurd Slåttebrekk på klaver.
Sommaren har slått til, og
kva kan vere meir riktig enn å gå på ein
konsert med klassiske
tonar i vakre omgjevingar? For tredje gong arrangerast sommarkonserten i Jelsa
Kyrkje. I år er arrangementet utvida med ein konsert på Kulturhuset i Suldal.
- Ideen til
sommarkonsertane vart fødd for fem år sidan når eg og mannen min fekk besøk av
ein entusiastisk venn og kollega frå Israel. Han meinte Jelsa var som skapt for
ein musikkfestival, seier Inger Slåttebrekk Orestad.
Det er ikkje tilfeldig
valt musikk som blir å høyra på konsertane i
Jelsa kyrkje og på
Kulturhuset i Suldal. Konsertane startar med Strykekvartett opus 76
nr.2 av Joseph Haydn. Denne er kanskje mest
kjend som
"Kvintkvartetten" med den svært berømte satsen som kallast
"Heksemenuetten".
Når ein hører dette forstår ein kvifor den blir
kalla dette.
Vidare i
konserten gjer musikarane sin hyllest i
anledning Grieg-året ved å
spela Ballade opus 24 av Edvard Grieg. Dette er variasjonar over ein
norsk folketone som både er enkelt og flott på
ein gong. Avslutningsvis
bruser konserten ut i Robert Schumann sin
klaverkvintett opus 44, og
for å trekke linjene til Grieg, vert ofte
Schumann sin klaver- konsert
samanlikna med Grieg sin klaverkonsert.
Sjølv spelar Inger
Slåttebrekk Orestad bratsj. Med seg på desse
konsertane får ho broren
Sigurd Slåttebrekk på klaver, Hans Josef Groth på cello, og Finn Orestad og
Robert Mozes på fiolin.
- Me har valt musikk som
går rett i fletta på folk, og som treff rett i den norske folkesjela, avsluttar
arrangør og musikar Inger Slåttebrekk Orestad.
| 
Utskriftsvennlig version